EFÉMEROS CASCOS HISTÓRICOS

Neste pais adoitase presumir de casco histórico nas guías turísticas, pero ninguén ten moita conta de conservalos, e minuciosamente se van transformando ate quedar nunha lembranza en forma de foto sepia. É lamentable dicilo pero o casco histórico de Ortigueira xa non merece que o nomeen así. O concepto de rehabilitación foi descoñecido ate hoxe, e baixo semellante ignorancia se seguen a derrubar edificacións tradicionais (xa, non eran palacios renacentistas, que por aquí mal que lles pese a algúns non hai un pasado de fastos nobiliarios, e non tiñan a condición de patrimonio da humanidade recoñecido pola ONU, pero formaban parte do noso patrimonio cultural, eran parte da nosa riqueza histórica) para substituílas pola vulgaridade monocorde da construcción moderna, sen tentar sequera conxugar estilo ou tipoloxía. Despois veñen as custosas intervencións públicas, como de desagravio por tanto abandono, pero xusto ao revés do que se precisa, fanse para ser notorias, evidentes, impactantes ( queren así notoriedade os alcaldes pouco notorios) e así pónselle a guinda ao deterioro. E así temos un lugar irrecoñecible, impersoal, fora de lugar, que ten pouco de espacio público (mais de bazar chino) e nada, absolutamente nada do que foi, e nada do que se tiña que haber feito pero sobre todo deixado de facer para que houbese un verdadeiro casco histórico, fora das retocadas fotos de guía turística e das fantásticas (literalmente) exposicións coas que os alcaldes acomplexados maquillan a súa xestión baleira.

servido por ortigueira 4 comentarios compártelo