APROBASE A LEI DE MEDIDAS URXENTES DE PROTECCIÓN DO LITORAL CON OPOSICIÓN DO PP
Nuñez Feijoo manifestouse encendidamente en contra das medidas transitorias aprobadas polo goberno da Xunta, que limitan no prazo de dous anos a edificabilidade nos primeiros 500 metros da costa, que afecta concellos que non teñan POXOM axustado á legalidade vixente, e que ten por obxecto paralizar a escalada urbanística desenfreada que ameaza con desfigurar irreversiblemente o litoral da comunidade galega. Feijoo posiciónase da banda da CEG (Confederacion de Empresarios Galegos) que ve gravemente prexudicados os seus intereses e que considera que estes, son os intereses de toda a Comunidade. Tamén se opoñen á medida os alcaldes dos concellos que teñen paralizadas moitas ( nalgún caso enormes cantidades) de licenzas que se tiñan comprometidas, e que poñen un persoalísimo empeño en que se volva á situación anterior na que non apreciaban motivo de alarma e polo contrario unha gran ocasión de prosperidade para a súa vila. Feijoo protesta por esta situación que cualifica de desamparo xurídico para estes rexedores municipais pero tamén advirte que o retraso da entrada en vigor da lei pode ser unha chamada para movementos especulativos, supoñemos que referíndose a casos como o de Sanxenxo ( gobernado polo PP), e por outro lado avoga por unha lei do Litoral definitiva, polo que non acabamos de saber si rexeita a Lei por innecesaria ou por insuficiente, nin para qué reclama outra nova lei si lle parece que estaba todo ben como ata agora.
