UN PASO MAIS CONTRA O CERCO DO LADRILLO
Para principios de xullo esperase que entre en vigor a nova “Ley de Suelo” de ámbito estatal que recentemente foi aprobada polo Senado superando o veto do PP. O obxectivo da nova lei é frear a desorde urbanística que provocou a permisiva lexislación do anterior goberno que liberou a práctica totalidade do territorio español coa presunta intención de evitar a especulación sobre o solo e abaratar o costo da vivenda. As nefastas consecuencias de tal medida foron unha explosión urbanística de caracter netamente especulativo que elevou os prezos desmesuradamente e agravou de forma inédita as dificultades de acceso á vivenda ao tempo que creaba un serio problema de ordenación do territorio, se convertía nunha enorme ameaza ambiental e facilitaba a creación de condicións para o desenvolvemento de tramas de corrupción de ámbito municipal pero de alcance autonómico e incluso estatal. A nova lei parte alomenos do recoñecemento dun problema cuia existencia o goberno anterior non estaba disposto a admitir e inclúe medidas para favorecer a transparencia nos procesos de recalificación do solo e evitar a corrupción das administracións involucradas nestes procesos. Asemade tenta dificultar a invasión inxustificada do espacio rural e facer mais efectiva a protección dos espacios incluídos na Rede Natura 2000 e parques naturais que en comunidades como Murcia e Baleares viron reducida en moitas hectáreas a súa extensión para ser monstruosamente urbanizadas. Pero aparte das moi boas declaracións de principios, a lei adoece de insuficiencias normativas relativas por exemplo á maneira de xustificar a necesidade de urbanizar o solo rústico, e de ambiguedades tan flagrantes como considerar susceptible de liberación os espazos protexido ambientalmente si se “xustifica cientificamente a perda dos seus valores naturais”. Preguntámonos si non é esto un chamamento a degradar previamente os espazos naturais para a continuación promover a sua urbanización, operación cuio precedente son aquelas de queima de montes que amañaban ata fai pouco algunhas mafias inmobiliarias.
