O CONCELLO DE ORTIGUEIRA DEFENDE A LICENZA DE PARQUEMAR

O Concello de Ortigueira declara, segundo publica hoxe El Diario de Ferrol que a licenza concedida para construír a urbanización Parquemar na zona de protección do castro Campo da Torre está “completamente en regra e que se actuou conforme á lei á hora de outorgar o citado permiso”. O Concello contradí deste xeito o informe dos técnicos de Patrimonio onde se establece que:

1. A citada urbanización afecta á zona de protección dun castro catalogado
2. As obras realizadas carecen de autorización da Dirección Xeral de Patrimonio
3. A autorización de Patrimonio é preceptiva para calquera intervención nun ben inventariado.

Preguntámonos cales destes puntos probados e incontrovertibles se pretende desmentir dende o Concello. E recordamos que aínda estamos agardando a intervención da Dirección Xeral de Urbanismo en relación á mesma urbanización Parquemar, neste caso por vulnerar as normas subsidiarias do planeamento urbanístico no artigo que establece a prohibición de edificar nos cen primeiros metros do contorno dun castro.

Reiteramos a nosa preocupación polo atraso de ámbalas dúas entidades públicas para intervir, o cal está a permitir un progreso das obras notablemente acelerado polos constructores que, se a promoción é finalmente expedientada, só redundará en prexuízo dos cidadáns, os que finalmente nos temos que asumir as consecuencias da ineptitude das administracións.

servido por ortigueira 4 comentarios compártelo