O PEOR QUE LLE PODERÍA ACONTECER AS PONTES

O traslado da factoría de Ence á localidade veciña non so pode estar xa decidido senón que incluso pode estar xa en marcha. A Asociación ecoloxista Erva denunciaba a semana pasada (Vieiros e A Nosa Terra) que o proxecto de lago artificial que se presenta como unha recuperación da mina de lignito de As Pontes esconde o propósito de crear unha infraestructura necesaria para a celulosa. Isto, segundo esta organización, explicaría o feito de precipitar o enchido de auga do futuro lago, pese a non estar concluído o proceso de selado dos fondos, e sen valorar as serias obxeccións que desaconsellan o proxecto. Esta mesma asociación e outros grupos como Fusquenlla, Verdegaia e a Sociedade Galega de Historia Natural denuncian (ver aquí) dende fai tempo a ausencia e un estudio de impacto ambiental do lago pese as fundadas sospeitas de que se produza un proceso de acidificación das augas que non soamente faga inviable o lago para os fins recreativos con que o promocionan senón que o acabe convertendo nun “área ambientalmente perniciosa”.

Erva considera que a celulosa, que perpetúa un modelo industrial e forestal nefasto para o pais, é ”o peor que lle podería acontecer a As Pontes”. Dende o incongruente ámbito político os mesmos que recoñecen os prexuízos económicos, ambientais e sociais que determinan imperativamente a necesidade do traslado da fábrica de Lourizán, por outra banda promoven a súa instalación noutro lugar. Mentres Medio Ambiente (PSOE) promete para o novo emprazamento garantías que non ofreceu en Pontevedra, o BNG predica a necesidade inescusable dunha papeleira no pais despois de facer bandeira do desmantelamento da actual. E, en Pontevedra,o representante do PP, Telmo Martín, non oculta que o interés urbanístico dos terreos ocupados actualmente pola celulosa motivan a diverxencia que adoptou respecto á postura tradicional do seu partido contraria ao traslado de Ence. O interés electoral fai fluctuar o discurso segundo se trate de comicios locais ou nacionais, segundo a localidade e segundo o demanden as circunstancias. O obscurantismo e a indefinición respecto a este tema da efectivamente lugar a suspicacias e,pola nosa parte, á convicción de que son intereses espurios os que motivarán unha decisión que conleva importantes trastornos en zonas de particular interés natural como o parque do Eume e sobre todo na calidade de vida e a saúde de moita xente.

Posts relacionados: