HOXE NA QUINTANA
ESTRACTO DO MANIFESTO LIDO HOXE NA QUINTANA, ANTE UNHAS 3000 PERSOAS:
As persoas que berramos GALIZA NON SE VENDE expresamos as nosas ganas de vivir e de recuperar e potenciar os espazos e coñecementos que nos serviron durante séculos, para que nós e as persoas que veñan despois teñamos un futuro garantido.
"Nós sabemos que a Terra non nos pertence, senón que somos nós os que lle pertencemos á Terra". (1)
Por iso non a podemos vender.
Pertencemos a unha terra antiga, montuosa e delicada, humanizada de xeito sustentable ao longo de séculos. Unha terra onde case cada lugar tivo e ten utilidade material e significado vital e que leva asociado, polo tanto, un importante patrimonio cultural, histórico, arqueolóxico e etnográfico. E un importante patrimonio inmaterial que está inserido na conciencia colectiva do País.
"Nós sabemos que o ser humano non creou o tecido da vida, senón que é tan só un fío del. E aquilo que fagamos a ese tecido farémonolo tamén a nós".(1)
As persoas que berramos GALIZA NON SE VENDE temos moi claro que non imos quedar indiferentes ante falsos discursos de cidadanías e democracias cando se nos criminaliza por ser cidadás e cidadáns e expresar o que pensamos. Non imos quedar indiferentes ante discursos que baleiran de contido as palabras, e agochan detrás actuacións cheas de parcialidade.
“Como se pode comprar o azul do ceo ou a calor da terra? Quen pode vender o vento, as ondas do mar ou a luz do mencer? O ser humano non pode posuír a terra, como tampouco pode ser amo do ceo, do frescor do aire ou do brillo da auga. Nós somos unha parte da Terra, e ela é unha parte de nós".(1)
Por iso estamos aquí, para amosar que aínda mantemos intacta a nosa dignidade de pobo que non quere morrer. Para defender a paisaxe, a natureza, a Terra, a nosa identidade e a nosa forma de vida. Para reclamar o noso dereito a unha terra viva e a unha vida digna.
Para berrar unha vez máis, con voz unánime, forte e clara:
GOBERNE QUEN GOBERNE, GALIZA NON SE VENDE
Compostela, 15 de febreiro de 2009
__________________________
(1) “Nosaltres som una part de la terra" Mensaxe do Gran Xefe Seattle ao presidente dos Estados Unidos de América no ano 1855. J.J. Olañeta, editor. Palma de Mallorca 2002.
.... dijo
gustaríame saber a postura de O.S. ante o ataque continuo que sofre, non a natureza, senón a nosa lingua, o galego, por plataformas: coma Galicia Bilingüe, ou partidos coma: o PP e, o recentemente creado, UPyD.
e despois de ver as fotos de GNSV e as de GB, a miña pregunta segue sendo, por qué para os intereses españolistas as cifras rondan os 7.000 (segundo a Voz, logo rebaixado a 4.000) e para outros baixan as cifras?? De feito, na de GB dubido que houbese máis que hoxe por Santiago, de feito, estou totalmente convencido, que hoxe fumos máis que o pasado domingo.
Non é un tema sobre os que soedes tratar, pero gustaríame que algunha vez vos pronunciárades sobre isto.
Un saúdo!
15 Febrero 2009 | 10:33 PM